Palamente e lokela ho jarisa mopresidente Cyril Ramaphosa boikarabelo ba ho tlola molao

Mekga ya bohanyetsi palamenteng e bolela ha e tlo sebedisa makgotla a dinyewe le palamente bakeng sa ho etsa hore mopresidente Cyril Ramaphosa le ditho tsa kabinete ya hae ba jare boikarabelo ba tlatlapo e patilweng e bileng polasing ya hae ya Phala Phala. Seboka sa baqolotsi ba ditaba se entsweng ka kopelo le mekga ya bohanyetsi, e kenyelletsang mokga wa DA, EFF, IFP, ACDP, UDM, NFP, ATM, COPE le PAC e bolela hore palamente e lokela ho jarisa mopresidente Ramaphosa boikarabelo ba ho tlola molao,kano ya kantoro ya hae le dipehelo tsa molao wa naha wa motheo ha ho lekolwa se etsahetseng polasing ena ya PhalaPhala. Mopresidente wa EFF, Julius Malema o re mekga ya bohanyetsi e tla boela e mema le mekgatlo ya baahi hore ba rale leano la ho jarisa mopresidente boikarabelo. Mekga ena ya bohanyetsi, e boetse e ikemiseditse ho neha motsamaisi wa dipuisano palamenteng ya naha, Nosiziwe Mapisa Nqakula, mabitso a baahlodi ba bane (4) ba tlang ho fuputsa boitshwaro bona ba mopresidente Cyril Ramaphosa.