BY THABANG MOHALE
Mokgatlo wa baahi wa MAP 16 eleng ona o ka bongateng tsamaisong ya Masepala wa Maluti a phofung o ananetse ka diatla tse pedi raporoto ya hlahlobo e entsweng ka hare ho masepala le ha o ntse o ipiletsa hore ho etswe diphuputso tse kenelletseng tsa forensiki.
Ka kgwedi ya Hlakola majoro wa phethahatso Masepaleng ona Gilbert Mokotso o ile a ipiletsa ka hare ho lekgotla hore ho be le diphuputso tse ka ha batho ba lefshwang ke masepala empa e se basebelletsi ba masepala.
Sena ebile mohoo wa ka nako e telele wa MAP 16 wa ho hlaola bobodu ka hare ho Masepala,mme dikateng tsa dipatlisiso di bontshitse ha ho ena le sethotsela se bitswang T. Van Der Berg seo eseng mosebelletsi wa Masepala empa a lefshwa tjhelete e ballwang ho R7 848.33 ka kgwedi ho tloha selemong sa 2018 nakong ya puso ya ANC.
Ho ya ka dipalopalo Van Der Berg o se a jele tjhelete e kalo ka R329 629.86,mme mokgatlo ona wa baahi o ipiletsa hore sethotsela sena se bulelwe nyewe ka potlako molemong wa hore tjhelete eo e kgutliswe ka ha ele ya setjhaba sa Maluti a phofung.
Ho ya ka mmuedi wa MAP 16 Mmutlanyana Sekete,ditefello tseo esaleng di lefshwa sethotsela sena di kginnwe hanghang,mme boipiletso ke hore ho bulwe nyewe ya bobodu le boshodu ka ho panya hwa leihlo.
Sekete o hlalositse hore taba ena ya dithotsela tse lefshwang ke Masepala wa Maluti a phofung e hlokometswe ka selemo tsa 2014/2015 empa ANC le DA di ile tsa nyemotsa taba ena hofihlella lena le hodimo.
Raporoto ena e boetse e sibollotse hore ho na le batho ba 23 bao eleng basebelletsi ba Masepala ona empa e se ele dilemo jwale ba fumana meputso empa ba sa iponahatse mosebetsing,mme meputso ya bona e kginnwe hanghang ka le reng taba eo e kekeng ya dumellwa tlasa puso ya MAP16.
Ho sa le jwalo ho boetse ho fumanwe hore ho na le batho ba 14 bao ho sa tsejweng hore ke bo mang,mme le bona ba ntse ba fuputswa.
MAP16 e boetse e ipiletsa hore batho bohle ba hlahellang raporotong tsa ho tloha 2014 tsa lekala la diphuputso la SIU ba llelwe ke ditshepe hammoho le bohle ba amehang manyofonyofong a kabo ya ditendara tsa PPE hotloha ka 2019.
Ho sa le jwalo MAP16 ere e mema lekala la HAWKS ho etsa diphuputso le ho akgela ba amehang ntlwanatshwana,ho kenyelleditse ka hare R54 Million ya kabo ya ditendara e tletseng bobodu le R220 Million e neng e reretswe ho tlisa tharollo ya moshwelella phareleng ya metsi ka hare ho Maluti a phofung.
