By Thabang Mohale
Lefapha le meralo ya motheo Masepaleng wa Setsoto le ile la kgobokanya baahi ba toropo tse nne tse thehang masepala ona hore ba ntshe maikutlo ka phano ya ditshebelletso le ho tshwaela hore ebe ke diphetoho difeng tseo masepala o ka di tlisang setjhabeng sehleng sena sa ditjhelete sa 2022/23.
Kopano ena e ne e tshwaretswe holong ya motse e fumanehang ka hare ho toropo ya Ficksburg ka laboraro la 7 Lwetse,mme baahi ba bile seboko ka mathata a metsi ka hare ho Hlohlolwane le Library eo ba hlokang hore e fetolelwe lefapheng la ditaba tsa selehae ka ha Clocolan e hloka lefapha leo.
Hara tse ding baahi ba llile ka ditaba tse kenyelletsang theho ya mesebetsi ka ha boholo ba bona ele batho ba sa sebetseng ba bile ba tletleba ka ditsha tsa mabitla tse sa kampelwang hoo tshenyo ya majwe a mabitla e atang.
Phallo ya dikgwerekgwere le tshirelletso e jwalo ka lebala la dipapadi le toropong ya Clocolan ke enngwe ya ntlha tse bileng ka sehloohong baahi ba bile ba bontsha ha batjha ba ipolaisa dithetefatsi lebaleng leo la dipapadi.
Ho sa le jwalo mookamedi lefapheng la meralo ya motheo masepaleng wa Setsoto Molahlehi Makhele o hlalositse hore se ba kopantseng le setjhaba ke ho se nonya maikutlo ka ditshebelletso tseo se di hlokang ele hore masepala o tle o kenye maano a ho tlisa ditshebelletso setjhabeng le ho se bebofalletsa bophelo.
Makhele o hlalositse hore ke ntlha tse ngatanyana tse tshwanang tseo setjhaba se llang ka tsona tse kang phallo ya dikgwerekgwere,ho taboha hwa dipeipi tsa metsi tse ding.O hlalositse hore amang a mabaka a etsang hore dipeipi di phahlohe ke hoba ele marangrang a kgale haholo a bile a bontsha hore le basebelletsi ba masepala ba dieha ho phallela baahi ha ba tlalehile peipi tse tabohileng.
O boletse hore diporojeke tsa tokiso tse entsweng nako e shweleng ha di yaka tsa etswa ka nepo ke bo rakonteraka ba neng ba hirilwe ke masepala.
“Ho na le tse ding tseo eleng mekoti e meholo e ka bakelang batho ba ka welang ka hara yona dikotsi tse ka lebisang tahlehelong ya maphelo.Dibakeng tse kang Marquard le Clocolan re na le bana ba wetseng ka hara mekoti ena”Makhele.
Makhele o hlalositse ha ba laolwa ke ditekanyetso tsa ditjhelete hore ba ntjhafatse marangrang,tokiso ya ditsela le motlakase bakeng sa phano e ntlafetseng ya ditshebelletso,mme o kgothalleditse baahi ho lefella ditshebelletso a bile a ipiletsa hore ba senang lekeno ba tle dikantorong tsa masepala ho lo ingodisa lenaneng la batho ba senang lekeno le ba fumanang lekeno le tlase.
