By Thabang Mohale
Ficksburg-Sepolesa sa Ficksburg se fuputsa nyewe tse pedi eleng polao le dipatlisiso tsa polao.
Sena ke ka mora hore lepolesa le sebetsang Harrismith feela lapeng e leng Zone 6 Meqheleng le be le qwaketsano le mosadi wa lona hoo qetellong lepolesa lena le ileng la thunya mosadi le ho shebisa molomo wa sethunya ka ho lona.
Ho ya ka tlaleho ya sepolesa monna enwa o ne a le lapeng le mohatsae le bana nakong ya qwaketsano.Mmmuedi wa sepolesa Free State Botjhabela Warrant Officer Mmako Mophiring o re bana ba hlalositse ha qwaketsano ena e qadile nakong eo mmabona a botsang ntata bona ka dikamano tsa lerato tseo a nang le tsona ka ntle ho lenyalo.
“Ho utlwahala hore monna enwa o bile le qwaketsano le mosadi wa hae bana ba le teng ka tlung.Bana ba re mme wa bona o ile a botsa ntate wa bona ka dikamano tsa hae tsa lerato yaba o ntsha sethunya o thunya mme wa bona,mme ka morao ho moo ke ha a ithunya ka pela bana”Mophiring.
Mophiring o hlaositse hore ke taba tse bohloko ho bona ketsahalo tsa mofuta ona di ntse di tswela pele ho etsahala ka ha ba leka ka hohlehohle ho lwantsha ditlhekefetso tsa ka malapeng.
Ketsahalo ena e etsahetse nakong eo Afrika Borwa e ketekang matsatsi a leshome le metso e tsheletseng a emang kgahlanong le tlhekefetso ya basadi le bana,mme Mophiring o re taba ya tlhekefetso tsa ka malapeng e hloka hore batho ba batle dithuso ho baruti,bahlabulli le basebelletsi ba setjhaba.
Ho sa le jwalo ketsahalong e tshwanang ke moo monna ya dilemo di mashome a mararo wa Thaba bosiu Qwa Qwa a ileng a hlaba mosadi wa hae ka sebetsa se bohale sefahlehong le mmeleng.Ho tlalehwa ha monna enwa a ile a kgaola bara ba hae ba babedi diqoqotho ba dilemo di leshome le metso etsheletseng le leshome le metso e meraro le ho ba siya ba timetse.
Sepolesa se re sesosa sa ketso tsena ke qwaketsano eo ho yona monna enwa a neng a qosa mosadi wa hae ka bohlola.
Sepolesa sa Namahadi se ile sa biletswa sebakeng sa ketsahalo moo se ileng sa kututsa le ho se fumane mmelaellwa eo hamorao ho ileng hwa hlahella hore o tsamaile le bana ba hae ba babedi e leng mora ya dilemo di leshome le moradi ya dilemo di robedi.
Ho ile hwa hlahella hamorao hore bana bao ba ho rakgadi wa bona,mme mmabona o ntse a alafshwa sepetleleng sa selehae.
Ka labobedi la la 12 Tshitwe sepolesa se ile sa tswela pele ka letsholo la sona la ho tsomana le mmelaellwa,mme sa mo fumana a timetse ka tlung ya hae.
Mokomeshenara wa sepolesa Free State Lieutenant General Baile Motswenyane o bontshitse ha a ngongorehile haholo ke diketsahalo tsena tsa dipolao nakong ena eo Afrika Borwa e satswa tshwara matsholo a tlhokomediso ka tlhekefetso kgahlanong le basadi le bana,mme o ipileditse ho banna ho qoba ho hlekefetsa basadi le bana.
Sepolesa se fuputsa nyewe tse pedi tsa polao,teko ya polao le dipatlisitso tsa polao.
