Ho mamelwa hwa kopo yaho lokollwa ka bail hwa monna ya dilemo di 63 ya belaellwang ka peto ya ngwana ya dilemo di 11 e kgutliseditswe morao ke lekgotla la magistrate wa Ficksburg ka laboraro la 24 Phato.
Mmelaellwa enwa ya kekeng a bitswa ka lebitso molemong wa ho sirelletsa lehlatsipa o teketse lekgotla mabaka a etsang hore a lokollwe ka bail,mme hara ona o buile ka tlhokomelo ya ntlo,thepa le koloi a bile a supa hore ke yena mohlokomedi wa bana ba hae.
Mmelaellwa o netefalleditse lekgotla hore bana bao ha se ba hae ba madi ke bao a ba filweng ka molao le mosadi wa hae ya hlokahetseng ka selemo sa 2021.
Pele ho ka mamelwa kopo ena ya ho lokollwa ka bail mmelaellwa o ile a nkiswa kano mme o ile a hlalosa a se molato diqosong tseo a tjamelaneng le tsona eleng ya ho otla le peto.
Moikopedi enwa wa bail o hlaloseditse lekgotla hore a ka kgona ho lefa R1500 ebang a dumellwa ka bail,mme botjhotjhisi bo bontshitse ha ho se lebaka le ka etsang hore a fumantshwe bail ho ao a a tekileng ka ha mme wa mosadi wa hae le ba leloko ba ntse ba phela.
Ka lehlakoreng le leng paki ya mmuso ebile ele mofuputsi nyeweng ena constable Alleta Nhlapo o teketse lekgotla bopaki bo ka ha diphuputso tseo a seng a di entse.
Nhlapo o bolelletse lekgotla hore ha ho hlokahale hore moikopedi a fumantshwe bail ka ha a ka tshosetsa dipaki a bile a bontsha hore bophelo ba hae bo ka ba tlokotsing ho latela kgalefo ya setjhaba.
Le ha ho le jwalo leqwetha la moikopedi eleng Thomas Motaung le hlalositse ha ho makatsa hore ebe monna enwa ya qoswang ka peto le ho otla a hlaloswa ele motho ya kotsi feela a sa bontsha bohlaha nakong eo sepolesa se mo tsebisang ka diqoso tseo a tjamelaneng le tsona.
O hlaloseditse lekgotla hore moikopedi o ikisitse sepoleseng le ha a tsebesitswe ka diqoso tse kgahlanong le ena letsatsi pele a tshwarwa,mme o ile a ikobela molao.
Tumahole Moeletsane eo eleng mmuedi wa Makhabe life care foundation o hlalositse hore ba kgotsofetse haholo ke tsela eo lekgotla le sebeditseng kopo ena ka teng.
O hlalositse hore ele foundation ba fanne ka lengolo la bona la ditletlebo le emang kgahlanong le bail bakeng sa moikopedi ba ipapisitse le polokeho ya hae le ya lehlasipa.
O hlalositse hore ba tla lwana ya kgumamela ho bona moikopedi a sa fumantshwe bail.
Ka lehlakoreng le leng Matshediso Olifant hotswa Mary Raletooane Foundation o hlalositse hore mabaka a tekilweng ke moikopedi ha se a nang le boleng bakeng sa hore a ka lokollwa ka bail.
O hlalositse hore ba tla thefuleha haholo maikutlong ebang moikopedi a ka fumantshwa bail ka ha lehlasipa ke lona le hlahelletseng poaneng ho tsebisa ba haofinyane ka tlhekefetso tseo le phelang tlasa tsona ka nako tsohle.
Olifant o hlalositse hore lehlasipa le boletse ha le ne le sitwa ho bapala le metswalle ya lona ka ha le ne le latwa papading ke moikopedi wa bail.
O boletse hore ho bohloko hore ebe ditlhekefetso di etswa ke batho ba tsebahalang ebile setjhaba se ba tshepa.
Ho mamelwa hwa kopo ya ho lokollwa ka bail hwa moqosuwa enwa ho kgutliseditswe morao hofihlela ka la 31 Phato 2022 bakeng sa dingangisano.
