“MPATENG KE EME”: PROPHET MAHLABA

Mohlolohadi wa moporofeta ya seng a iketse boya batho Ernest Mahlaba eleng Emelda Mahlaba o hlalositse hore molekane wa hae o mo laetse hore a nyalwe hang ka mora hore a orohele lehodimong.

Mahlaba ore le ha monna wa hae a mo laetse ho nyalwa ha a so be malala a laotswe hore a ka kena lenyalong le leng,mme o supile ha a hloka ho hodisa bana ba hae le ho ba mohlala ho bona ba ka ha ele banana.

O boletse hore ele molekane wa hae o mo rutile ntho tse ngata haholo tse kenyelletsang ka hare ho tshwarela hoba o ne a sa robale a sa lokisa ditaba le batho bao a kgopisaneng le bona.

O hlalositse ntlha ya hore ho timela hwa monna wa hae e ntse ele semaka ho baphutheho le ho bana ba hae ka ha ba bua ka ena ka nako tsohle.

Moprofeta Ernest Mahlaba o fanne ka taelo ya hore ho se be le motho ya buang nakong ya tshebelletso ya hae ya lepato ka ha batho ba rata ho bua ntho tse ntle feela ka batho ba seng ba iketse boyabatho.

Mahlaba o bolokilwe a eme eleng se ileng sa makatsa batho ka ha ele enngwe ya taelo tseo a fanneng ka tsona pele a oroha.

“Ntho ya ho patwa a eme le nna e ile ya nhalefisa haholo hoo ke ileng ka bapalla batho kgatiso tsa video tsa ha a ne a bua taba ena tshebelletsong ya hoqetela kerekeng”:Mahlaba.

Le ha ho le jwalo Mma-Mahlaba o hlalositse hore baholo ba lelapa ba hlalositse ha Mahlaba a bolokilwe jwalo ka marena ka ha e ne ele tsela eo a bolokwang ka yona mehleng ya kgale.

O boetse a supa ha Mahlaba a hlalositse hore moya wa hae o tlo phela dilemo tse 178 lefatseng ke ka hoo a itseng ba se ke ba re a robale ka kgotso empa a tsamaye ka kgotso hofihlela dilemong tseo a di badileng hore moloko o tla beng o phela ka nako eo o tla qalella hore a robale ka kgotso.

Ho sa le jwalo mmuedi wa kereke ya Communion Bible Ministries e neng e etelletswe pele ke Moporofeta Ernest Mahlaba Lebohang Mokhele ore Mahlaba e ne ele monna ya makatsang haholo.

Ore ha se taba ya hajwale ya hore Mahlaba o tla biletswa Modimong ka ha hotloha ka kgwedi ya Mmesa ho bile le matshwao a hore o se a le malala a laotswe bakeng sa ho orohela lehodimong.

“Nna ha ke ya Makala,Papa o ne a tseba tsela ya hae hoba hotloha ka Mmesa o ne a nromella melaetsa ya hore o batla ho tsamaya a se hlole a fumaneha ka mohala empa ha re hloka ho bua le ena o tla ba teng ka semoya”:Mokhele.

Ore Mahlaba o mo siile le teko ya hore a ngole buka ka yena moo a hlalosang ka bophelo ba hae nakong eo a santsane a phela hofihlela a orohile.

Mahlaba o timetse nakong eo ba bapalang papadi ya bolo ya maoto ya setswalle ka mora hore e mong wa dibapadi a mo rahe tlasa mokgubu.

O fanne ka taelo ya hore a bolokwe a eme ka lekase la theko e tlase ka ho fetisisa.