By Thabang Mohale
Moqosuwa wa dilemo di 63 wa Meqheleng haofi le toropo ya Ficksburg o hanetswe ka bail ke lekgotla la dinyewe la Ficksburg ka laboraro la 31 Phato.
Monna enwa o qoswa ka peto le ho otla ngwana wa hae eo eseng wa madi ya dilemo di leshome le motso o mong.Tebello ke hore monna enwa ya kekeng a hlaloswa ka lebitso o tla boela a hlahella kgotla hape ka la leshome Mphalane bakeng sa ho mamelwa hwa nyewe ya hae.
Mothehi wa Marry Raletooane foundation eleng Matshele Raletooane o hlalositse hore o swabile haholo ke ketso e entsweng ke moqusuwa,mme o boletse hore hofihlela hajwale lekgotla le ntse le ba sebelletsa ka toka ha ele mona le hanne ho fana ka bail.
“sena se tla ruta bashanyana ba bangata ba ipitsang ka hore ke banna le hore ke baruti hore ha setjhaba se itse tjhe se itse tjhe”
Ho sa le jwalo modula setulo wa mokgatlo ona wa Marry Raletooane eleng Matshediso Olifant ore ba tla leka makgobonthithi ohle hore moqusuwa a se fuwe bail le ha a ka Kenya boipiletso.
Ore ba tlo etsa ditlhokomediso molemong wa tshirelletso ya bana ebile a mema setjhaba ho hlahella ebang ho na le batho bao eleng mahlatsipa a tjhekefetso tsa mofuta ona.
Olifant o hlalositse ha ba tlo kena matsholong a mangata ho netefatsa hore setjhaba se ya ruteha ka ditokelo tsa sona le ho ba hlokomedisa kgahlamelo eo tjhekefetso tsena di amang mahlatsipa ka yona.
Ka lehlakoreng le leng Tumahole Moeletsane hotswa Makhabe life care foundation o bontshitse ha ba kgotsofaditswe ke qeto ya lekgotla ya ho hana ka bail.
Ore ha ba ne ba ngolla lekgotla lengolo la ditletlebo ba ne ba shebile bophelo ba moqusuwa,lehlatsipa le maikutlo a setjhaba.
O hlalositse hore ebang moqusuwa a ka ipiletsa kgahlanong le qeto ya lekgotla bat la boela ba kgutlela lekgotleng la dinyewe ho le hlokomedisa bohlokolosi ba diqoso tseo moqusuwa a tjamelaneng le tsona.
