By Thabang Mohale
Ficksburg-Batswadi ba barutwana ba sekolo sa Tlotlisong se fumanehang Meqheleng ka ntlenyana ho toropo ya Ficksburg ba ile ba tsitsipana matsatsi pele bana ba bona ba phethela dihlahlobo tsa makgaolakgang tsa Matric tse neng di ngollwa tikolohong ya Ethembeni.
Tsitsipano ena e bakilwe ke poso e ileng ya solla ho marangrang a dikgokahano tsa setjhaba e manehilweng ke sebohodi sa kgaso ya setjhaba ya Setsoto Pitso Tsumane ya tummeng ka hore ke Ponto wa celeb moo a neng a hlalosa ha barutwana ba sekolo sena ba ena le tshabo ya hore ba tla betwa ka ha ho ena le bashanyana ba se seng sa dikolo tse moo ba ba nyonyobelang le ho ba kuka ditshwantso tse ponopono nakong eo ba ntseng ba hlapa.
Tsumane o bontshitse ha barutwana bana ba le seboko ka hore ba lahlehelwa ke mehala ya thekeng,mme puisanong le Phethoho News o boletse ha a kekeng a fana ka mehlodi ya hae ya taba ena ka ha a tlisitse tharollo tabeng ena ka sealemoya sa Setsoto seo a se sebelletsang.
“ha ke ya boloka nomoro tsa mohala tsa barutwana ba neng ba ntetsetsa hoba ba feta mashome a mabedi.Seo nka o eletsang ho se etsa ke hore o romelle molaetsa ho barutwana ba ngotseng leqepheng la ka posong e amanang le bona mohlomong ba tla o bolella ho re ho etsahetseng kampong.Ha ke bone bohlokwa ba hore nne le sale taba ena morao hoba ke buile ka yona sealemoyeng ka tlisa tharollo”.
Le ha dipuisano di qetelletse di kgitlile lejwe pakeng tsa Ponto le koranta,re tswetse pele ho etsa dipatlisiso le ho buisana le ba bang ba barutwana ba ileng ba nka karolo dihlahlobong tse neng di ngollwa Ethembeni,mme bona ba hlalositse ha ele nnete hore sebohodi sena se letseditswe ke barutwana.
“E ke nnete ho na le barutwana mmoho le rona ba ileng ba letsetsa Ponto mohala ba mmolella ka maemo a renang kampong eo re neng re ngolla ho yona.Ha ke tsebe hore Ponto o ne a se a fetelletsa ditaba kapa jwang empa seo ke hopolang ba mmolella sona ke hore bashanyana ba Tlotlisong ba ne ba robatswa ka hokong ha ba entse diphoso empa ba Marallaneng mosuwehlooho wa bona o ne a ba sirelletsa ha ba lokela ho fuwa kotlo e tshwanang” : morutwana wa pele.
”Le nna ne ke le kampong eo,mme seo nka se hlalosang ke hore ho na le nako eo motlakase o neng o le siyo yaba ho na le bashanyana ba tlang ka moo ho robalang banana.Re ile ra itshetleha ka mabota ra ba tlohela hore ba kene,ya re ha ba se ba le hare ra kgantsha mehala ya rona ya thekeng le ho ba hlasela le ha ba ile ba baleha empa ho na le ya sa kang a kgona ho phonyoha re ile ra mo shapa” : morutwana wa bobedi.
“Nna ke kena Marallaneng,taba ya hore re ile ra kuka banana ba tlotlisong ditshwantsho ha se nnete ke leshano le letala.Ponto ha a batla ho phatlalatsa ditaba o tlameha ho etsa dipatlisiso pele a ka bua ntho tseo a sa ditsebeng” : morutwana wa boraro.
Ho sa le jwalo emong wa batswadi ya sa ratang ha lebitso la hae le phatlalatswa o hlalositse hore taba ena ha e hlahella o ile a ferekana haholo ha a nahana ka moradi wa hae ya kampong ka nako eo.
O re se mo utlwisitseng bohloko le ho feta ke ho re ele batswadi ba ile ba qobelleha ho iketsetsa dipatlisiso ka ha Tsumane a sa ngola leqepheng la hare hore tharollo e bile efeng jwalo ka ha a ile a phatlalatsa dingongoreho tsa bona.
“Ngwaneso o so ka nahana pherekano eo re bileng le yona re le batswadi hoba motho eo ha a ya kgutlela ho rona ho re bolella hore ho ntse ho etsahalang ka bana ba rona.Re tsebile feela hore maphelo a bana a kotsing yaba ha ho sa na letho leo a re bolellang ha ese hore a lwantshe matitjhere posong eo ya hae.Nna ke ile ka letsetsa emong wa matitjhere a moo ke ena a ileng a nkgoba matshwafo a mpolella hore hahona ntho tse jwalo tse etsahetseng”.
Ho sa le jwalo Tsumane o ile a seholla ka bohale matitjhere a neng a leka ho mo kgalema posong eo ya hae ba re a batle mahlakore a mabedi a taba pele a ka phatlalatsa.O hlalositse hore matitjhere ao a etsa eka ha a tsebe hore o lokela ho netefatsa taba pele a ka e phatlalatsa a bile a ba romella ho emong wa matitjhere a mmitsitseng hore ke “Mr Sefatsa” hore ba mmotse na Ponto ke motho ya jwang.
Ditaba di sa le mothating ona mmuelli wa lefapha la thuto Free State Howard Ndaba o tshwetse ka sehlethela sa mathe menyenyetsi ena e entsweng ke sebohodi sa Setsoto FM ka le reng tlhahiso leseding ya mofuta ona e lahlehisang setjhaba ka ha e ka baka pherekano le ho tlisa tsitsipano le tshabo e sa hlokeheng ho barutwana le batswadi nakong ena e hlokolosi yah o phethelwa hwa dihlahlobo tsa makgaolakgang.
“Re ipiletsa ho basebedisi ba marangrang a dikgokahano tsa setjhaba ho fana ka tlhahiso leseding e netefaditsweng pele e ka patlalatswa maqepheng a bona.Re boetse re ipiletsa ho batswadi,barutwana le basebedisi ba marangrang ana ho se nke tlhahiso leseding tsa mofuta ona ka maikutlo pele ba ka iphumana ba lahlehisitswe”Ndaba.
