By Thabang Mohale
Warden-Lelapa le halefileng ho faswa ka marapo la ha Tshabalala Warden le re moahisane wa lona o lokela ho lefa tshenyo e bakilweng ke ntja tsa hae tsa Pitbull.
Sena se tla ho latela ketsahalo eo ho yona Pitbull tse nne tsa moahisane wa bona di kene ka jareteng ya Tshabalala le ho hlasela mohlape wa hae.Ntatemoholo Simon Tshabalala ke moahi wa Warden,mme o bolelletse bo raditaba hore yena le ba ntlo ya hae ba tsositswe ke lerata la phoofolo tsa hae mesong ya labohlano la la robong Tshitwe.
O re ha ba hlokomela hore ntja tseo di hlasela nku tsa hae ba lekile ho di lwantsha empa ka lebaka la tshabo hwa eba boima.Tshabalala o hlalositse ha ntja tseo di jele potsanyane ele nngwe pele di ka harola nku tse nne,mme o re ha ba na bonnete ba hore podi yona e nyametse kae.
Tshabalala o hlalositse hore se mo thefulang maikutlo ke hore o setse ka nku tse maqeba a tshabehang hoo a sa tsebeng hore o tlo etsang ka tsona ka ha a qobelleha ho hlaba nku tseo le ha a kekeng a dumela hore di jewe ka ha ba sa tsebe mahloko ao dintjanyana di ka bang le ona a ka qetellang a behile maphelo a bona tlokotsing.
O ipileditse ho mmuso ho kena dipakeng ka le reng monga dintja o lokela ho lefa ditshenyehelo le hore ho fihlellwe tharollo mabapi le polokeho ya tsheho ya mmedi ya dijarete,mme o supile ha a butse nyewe sepoleseng.
Moradi wa Tshabalala eleng Thoko o dumellana le ntatae hore moahisane o lokela ho lefa ditshenyehelo.O supile ha monga dintja a bontshitse lenyatso lapeng labo ha a ne a hlalosa hore ntja tseo di entse hantle tsa ja leruo la ntatae.O hlalositse ha se mo utlwisang bohloko le ho feta ele ha monga dintja a ngangabala ha baahisane ba bang ba mo hlokomedisa hore ntja tsa hae di phoso ka ho tlolela ka ha moahisane.
“Re tshwenyehile haholo ka polokeho ya maphelo a rona ka lebaka la batho ba sitwang ho hlokomela mofuta ona o sa tshepahaleng wa dintja.Ho na jwale re tlameha ho kwalla bana ba rona ka matlung ka ha dintja tsena di na le bokgoni ba ho kgaola terata ya tsheho ya meedi ya jarete tsa rona.”
Ka lehlakoreng le leng mmuedi wa sepolesa Thabo Mofutsanyana Warrant Officer Mmako Mophiring o re nyewe ya tshenyo ya thepa e butswe sepoleseng,mme sepolesa se etsa dipatlisiso.
