Itumeleng Lelimo ke motjha ya dilemo di 23 ya phelang Katlehong lekeisheneng la Meqheleng kantlenyana ho toropo ya Ficksburg,mme o ipuletse phapusi ya borutelo bakeng sa barutwana hore a ba thuse ka mosebetsi wa sekolo ha ba tswa sekolong.
Motjha enwa o thusa barutwana ba ho tloha Grade R hofihlella ho Grade 7.
Itumeleng ore o lekile ka matla ho fumana mosebetsi empa a hlokomela hore seo e tla ba tshenyo ya nako ka ha batjha ba bangata ba dutse malapeng ka mangolo a thuto ho se seo ba se etsang ka lebaka la tlhokeho ya mosebetsi.
Ore o ile a hlokomela hore mme wa hae o hula ka boima ho bona hore ba robala ba jele le ngwanabo ke ka hona a ileng a rwala dieta le ho bula setsi sena sa ho thusa bana ka dithuto tsa bona.
“ke sebeditse ke le mothusi wa tsa thuto sekolong sa mathomo sa Caledon,mme ya re ha kontraka yaka e fela ka hloka mosebetsi eleng moo ke qadileng phapusi ena ya ka ka morutwana a le mong”.
Itumeleng ore ka lebaka la lerato la thuto le bana o ile a bapatsa ho marangrang a dikgokahano tsa setjhaba eleng moo a qalelletseng ho fumana mehala ya batswadi ba hlokang hore bana ba bona ba thuswe ka mosebetsi wa sekolo.
Ore o ntse a emetse lengolo la hae la Diploma la Educare a tle a tsebe ho ngodisa setsha sa hae sa ho thusa bana semolao,mme ore hajwale o kgannwa ke lerato la thuto le tlhokeho ya mosebetsi hore ebe o ntse a sebetsa ka bana ba sokolang dithutong tsa bona.
Itumeleng o ipiletsa ho moithaopi wa boitatelo bo botle ho mo phallela ka ditafole,ditulo,dibuka le dithusa thuto molemong wa ho thusa bana ka ha ho ena le kgaello ya disebediswa phaposing ya hae.
Ho sa le jwalo Grace Tsatsi eo eleng mme wa emong wa bana ba fumantshwang thuso phapusing ena ore o kgothalletsa batswadi ho isa bana ba bona ho itumeleng o tla ba thusa haholo.
“ngwana waka o ne a sokola haholo thutong ya dipalo ka mo isa phapusing ya Itumeleng,mme ka nako ya beke tse pedi feela ke bone diphethoho” o rialo Tsatsi.
Dithuto phaposing ya Itumeleng di kena mantaha hofihlela labohlano ha dikolo di tswa hofihlela ka hora ya bohlano mantsibua.
