By Thabang Mohale
Ficksburg- Sekolo se phahameng sa Marallaneng se ile sa tshwara mokete wa ho ruta bana ka botjhaba ba bona ka labone la 22 Lwetse holong ya sekolo.
Mohlophisi wa mokete ona ebile ele mosuwetsana sekolong sena Eva Maduna o hlalositse hore ba nkile nako ho hlokomedisa barutwana ka botjhaba ba bona.O hlalositse hore barutwana ba lokela ho tseba moo ba tswang hore ba tsebe moo ba yang.
Maduna ore ho bohlokwa hore setjhaba se tsamae menyabuketsong ya badimo ba sona le ho ntshetsa pele nalane eo badimo ba e siileng lefatsheng le ho ntshetsa pele mekgwa le meetlo eo ho neng ho phelwa ka yona nakong e fetileng.
O supile ha botjhaba bo sa hlomphuwe ho lekana a bile a hlalosa ha setjhaba se lokela ho ba motlotlo ka botjhaba ba bona ho sa natse morabe.
“ Re lokela ho qalella ho ikgantsha ka botjhaba ba rona letsatsi ka leng re le batho ba merabe e fapaneng hoba re lokela ho ithuta hore re bo mang setsong le ho kgona ho itseba botjhabeng”.
Maduna ore batjha ba lokela ho ba motlotlo ka botjhaba le setso sa bona,mme ho fihlella seo ba lokela ho itseba ka botlalo hore ke bo mang.O re ba kekeng ba qhelela ka thoko diphethoho tseo ba di bonang mehleng ya hajwale moo marangrang a seng a nkile ntho tse ngata jwalo ka ditsela tsa ho ithuta le mekgwa ya dipuisano,mme ha ho letho le ka etswang hajwale ka boemo boo.
O hlalositse hore batjha ba hajwale ba holela ka matlung hoba ha ba sa bapala hoo ba tsepamisang mehopolo ya bona haholo ho Marangrang ho feta nthong tse ding.
Hlathe e ne e lelekisa tsebe ho barutwana ba sekolo sena ka ha ho bile le dipapadi tse fapaneng tse kenyelletsang mokgibo,ditolobonya,mohobelo,dithotokiso le tse ding,mme ho ne ho boetse ho phehilwe dijo tsa Sesotho tse akgang ka hare dikgobe,dipabi,malamohodu le tse ding.
