By Thabang Mohale
Ficksburg-Lekgotla la dinyewe la lebatowa la Ficksburg le qheletse ka thoko kopo ya ho lokollwa hwa koloi ya Joaquim Alves eo koloi ya hae e ngodisitsweng ka hare ho naha ya Lesotho e ileng ya haptjwa ke ba ditshebelletso tsa lekgetho Afrika Borwa eleng SARS.
Kopo ena e ne e mametswe lekgotleng la lebatowa la Ficksburg ka labone la 8 Letswe.
Alves o boletse hore e bile leeto le letelele a ntse a matha makgotla a dinyewe ka mora hore a llelwe ke ditshepe le ho fumanwa a se molato,mme hajwale o hlekefetswa ka ho se fumantshwe koloi ya hae eo esaleng e nkuwa ke sepolesa le ho nehelana ka yona ho SARS.
Alves o hlahelletse hakgutshwanyane ka pele ho lekgotla a ikemetse ka mora hore a hlalosetse lekgotla hore leqwetha la hae le mo nyahladitse.
Pele a ka hlahlela kopo ya ho lokollelwa koloi,lekgotla le file SARS monyetla wa ho teka dihlooho tsa dingangisano le mabaka a hore hobaneng maqwetha a SARS a lokela ho ba karolo ya dingangisano,mme maqwetha a SARS a sitilwe ho fa lekgotla mabaka a tshwarehang bakeng sa hore a ka ba teng ka hare ho dingangisano.
Botjhotjhisi bo ile ba eba karolo nyeweng ena e neng e le pakeng tsa mmuso le moikopedi wa tokollo ya koloi,mme lekgotla le tekile mabaka a etsang hore le se lokolle koloi ena ka ha e hapilwe bakeng sa kotlo ebile le supa hore qeto tsohle tse malebana le koloi ena ya Alves di nketswe lekgotleng le leng eseng ho la lebatowa.
Alves o bonsthitse ha ele lehlatsipa nyeweng ena,a bile a bolela hore SARS ke lefapha la mashodu le duletseng ho ja ka sehloho matla a batho ba itshebelleditseng ka thata.
O hlalositse hore pelo ya hae e rotha madi ke ho itokolla hwa leqwetha la hae eleng Mkhosi Radebe kopong ena,a bile a tiisa ntlha ya hore Radebe ha a ya mo fa mabaka a etsang hore ebe o itokollotse.
“Ha ke tsebe ka botlalo mabaka a hae a ho itokolla empa sena se nthefutse maikutlo,mme kenahana hore ha a ya latela methati e nepahetseng ya ho itokolla hoba o ne a lokela hore ebe o tlile lekgotleng kajeno a tlo itokolla semolao,empa mabaka a hae a ho itokolla ha ke a tsebe o tla tlameha hore o mmotse”Alves.
Alves o phethetse taba tsa hae ka hore a keke a e lala ka mmele ka ha a ntse a tlo tswela pele ho lwanela tokelo tsa hae hofihlela toka e phethahaditswe.
Ho sa le jwalo koranta e lekile ho buisana le SARS empa basebelletsi le maqwetha a lekala lena ba bontsha ha ba sa lokela ho buisana le bo raditaba.
Ka lehlakoreng le leng koranta e buisane le leqwetha la Alves eleng Mkhosi Radebe,mme ena o hlalositse ha Alves a tseba hantle mabaka a entseng hore a itokolle kopong ena.
Radebe o boletse hore ka molao ha ba ya dumelletseha hore ba bolelle bo raditaba ka botlalo mabaka a entseng hore a itokolle empa Alves o hlaloseditswe mabaka ao ka ho phethahala ka ha a ne a le kantorong ya bona ka la tshelela kgweding ya Lwetse.
O boletse hore Alves o susumeditse hore nyewe ena e nsthetswe pele lekgotleng la lebatowa le ha ba ne ba mo eletsa hore e lebiswe lekgotleng le phahameng la dinyewe.
“Lekgotla le tsebisitswe ka la 15 Phupu ha letsatsi la nyewe le ne le le ka la 8 Lwetse,ntho eo a e buang kgatisong eo le re romelletseng moo a reng ha a tsebe mabaka a ka a ho itokolla ha se nnete hoba ka la 6 o ne a le teng kantorong tsa rona ra ba ra dumellana le ena hore kgotla ha ke ye” Radebe.
Radebe o hlaloseditse koranta hore ba se ba romelletse Alves molaetsa ka email moo ba mo tsebisang hore ha ba ya thaba hohang ke tsela eo a hlalositseng ditaba ka teng ho bo raditaba feel aba buile le ena pele ho nyewe.
