By Thabang Mohale
Ficksburg- Nakong ena eo Afrika Borwa e ketekang kgwedi ya botjhaba monna wa Mosotho o ile a sasanka le toropo ya Ficksburg a ikaparetse leqa la tjale le kwahetseng botho ba hae feela ebile le na le kgwele e potelang ka letswapong.
Monna enwa ya neng a bonahala a bo tjepotse o ile a etsa kgwebo nakong eo a hlokomelang hore batho ba thahasella ho mo kuka ditshwantso,mme o ne a ba lefisa tjhelete e kalo ka ranta tse pedi hore ba mo kuke ditshwantsho.
Koranta e buisane le monna enwa ya itlhalositseng ele “Lekhoisan la Ficksburg” mme o supile ha a se a bokelleditse tjhelete e mo kgotsofatsang hotloha nakong eo a lefisang batho ho mo kuka ditshwantsho.
O boletse hore ha se le taba ya tjhelete hakalo empa o ne a iketekela botjhaba jwalo ka motho e mong le emong ka tsela ya hae ke ka hoo a ba lefisang hoba ho ne ho se motho ya hapang mahlo a batho ba tlileng toropong ntle le ena.
O boetse a kgothalletsa hore batho ba hlomphe le ho tsotella botjhaba ba bona a bile a supa hore o ne a ka itswella pele ho ikaparela ka tsela eo hoja bophelo bo ne bo tshwana le nakong ya kgale empa ka ha mehla e fetohile o se a hlokometse hore ena ke enngwe ya ditsela tsa ho ikenyetsa tjhelete.
“Akere ke lona le hlokang ditshwantsho tsa ka,mpataleng R2 le tsebe ho ba le nna mehaleng ya lona ya thekeng.Ena ke kgwebo ya ka hoba hahona mesebetsi mona Afrika Borwa ebile re le batho ha re ya lokela ho itshetleha ho mmuso re ka ithehela mesebetsi”
Naha ya Afrika Borwa e ketekile letsatsi la botjhaba ka la 24 Lwetse,mme batho ba ile ba bonahala ka bongata mebileng ya naha ena le dibakeng tse neng di hlwailwe bakeng sa meketeko ba kgabile ka diaparo tsa bona tsa setso.
Boholo ba batho bo ne bo apere dishweshwe hoo le banna ba bonahetseng ka marikgwe le dihempe tse entsweng ka lesela la seshweshwe.
