By Thabang Mohale
Ficksburg: Sealemoya sa selehae sa Setsoto se fumanehang toropong ya Ficksburg se ile sa tshwara kopano ya selemo le selemo ka moqebelo wa la 17 Lwetse monongwaha.
Ke lekgetlo la bobedi selemong sena kopano ena e tshwarwa ka ha e ile ya tshwarwa ka la 10 Mmesa.Ho ya ka mookamedi wa kgaso ena Thabiso Sibiya,lekala le ikemetseng le fanang ka laksense tsa kgaso eleng ICASA le fanne ka taelo ya hore dikgetho tsena di phethwe ka ha di sa tsamaiswa ka nepo nakong e fetileng.
O hlalositse hore ho bile le ditletlebo tseo ba di nketseng hloohong,mme kgetlong lena ba kgotsofetse ha ele mona dikgetho di tsamaile hantle ntle le tshetiso a bile a supa hore ba tla romella ICASA raporoto ya dikgetho tsena tsa lekgotla la bolaodi tse satswa tshwarwa.
Sibiya o hlalositse hore ho ya ka molaotheo ba ne ba lokela hore ebe ba kgethile ditho tse tsheletseng tse ntjha ka hara lekgotla la bolaodi empa ba ile ba kgetha tse tharo ba siya tse tsheletseng tsa kgale e leng se entseng hore dikgetho di phethwe,mme ke taba eo ba e lokisitseng dikgethong tsena.
Karabelong ya ditletlebo tse hlahletsweng ke batho ba sa kgotsofalang ICASA Sibiya o re ho bile le batho ba babedi bao a le mong wa bona a sakang a rata ha lebitso la hae le ka pepeswa,mme ba hlalositse ha bookamedi ba kgaso bo sebedisitse tjhelete ya kgaso ho rekela dibohodi jwala lefung la mme wa emong wa basebetsi mmoho.
“ICASA ha e ya re hlalosetsa hore ditletlebo di tswa ho bo mang,empa boholo ba ditletlebo tseo ha dina motheo hoba hothwe nna le modulasetulo wa lekgotla la bolaodi la kgaso re reketse dibohodi jwala lefung le itseng ka tjhelete ya kgaso.Enngwe ya tletlebo tsena ke hore re lefelletse batho ditekesi hore ba tle dikgethong empa ha o sheba account ya kgaso ha diyo ntho tseo ba buang ka tsona ka hona re tla di nka ele mabarebare.”
Sibiya o hlalositse hore ho na le tsela eo dikgetho ba di tshwarang ka yona ho latela molaotheo wa bona.O hlalositse ha batho ba dumelletsweng ho nka karolo ele ba nang le botho ba kgaso,mme ba senang bona ba tla feela ka ho boha ha dikgetho di tswela pele.
O supile ha ba swabile nko ho feta molomo ka ha ba ne ba lebelletse hore ICASA e tla ba karolo ya dikgetho tsena.Ore ba ngolletse ICASA lengolo la memo empa ba fumane karabelo ya mabaka a fapaneng a ho se be teng,mme ore dikgetho tsa mofuta ona di na le ditjeho tse ngata haholo ka hare.
Ka lehlakoreng le leng mongodi e moholo wa mokgatlo wa diyalemoya tsa selehae eleng NCRF provinsing ya Free State Juwaan Fubane o hlalositse hore hangata ho feta hanyane ICASA ha e kebe e nke karoro dikgethong tsa makgotla a bolaoi a diyalemoya.
“Kei le ka e botsa taba ena hore hobaneng ha re tshwere dikgetho ICASA e sa tle,ke ile ka fumana karabo e reng ICASA e itlhokela raporoto e tswang ho mongodi ya tswang wa lekgotla leo la bolaodi,mme ke utlwile hore taba ena e etsahalletseng Setsoto e tla etsahalla Qwa Qwa radio le ha ke sa tsebe mabaka a bona a hore ba phethe dikgetho”
O hlalositse hore ha ba bala ditletlebo tse lebisitsweng Setsoto le ha ba sa tsebiswa mabitso a batletlebi ho ya utlwahala hore ekanna yaba ho emong wa bona ke motho eo ekileng ya eba setho sa lekgotla la bolaodi la kgaso ena.
Ditho tsa lekgotla la bolaodi tsa Setsoto FM tse kgethilweng kopanong ena di kenyelletsa ka hare,Tlalane Thabana,Joseph Linyelo,Tsekiso Lesaoana,Mafusi Rantaoli,Nnoki Rai,Malefetsane Maleke,Suzan Moqaola le Morena Sebofi.
