Advocate Teffo o bile kgahlano le ho busetswa morao ha nyewe

Advocate Malesela Teff eo e leng leqwetha la baqosuwa ba bane nyeweng ya polao ya sethibathibane sa Orlando Pirates le Bafana Bafana, Senzo Meyiwa, o re ditshoso di ntse di tswela pele kgahlanong le baqosuwa. Teffo o botsitse boteng ba Lieutenant Colonel Fourie eo ho tlalehwang a ile a botsa batjhotjhisi mabitso le diaterese tsa baqosuwa. Teffo o re ofisiri e ka hodimo e rometswe ke balaodi le letona la sepolesa. Feela botjhotjhisi bo re lepolesa lena le ile la kopa nomoro ya nyewe le mabitso a moqosuwa. Teffo o re o tshwenyehile ka polokeho ya baqosuwa le dipaki tsa baqosuwa. Ha ditaba di sa le jwalo Lekgotla lena le Phahameng la Dinyewe, Pretoria, le fane ka tumello kopong ya hore nyewe e busetswe morao. Sena se tla ka mora kopo ya leqwetha la moqusuwa wa bohlano, advocate Zandile Mshololo, ya hore a kgone ho bala dikateng tsa dokete e makaditseng ya bobedi nyeweng ena eo a e fumaneng ka Laboraro bekeng e fetileng. Advocate Teffo o bile kgahlano le ho busetswa morao ha nyewe, feela moahlodi Tshifhiwa Maumela a fumana kopo ya Advocate Zandile Mshololo, e utlwahala.